इच्छा

आता एवढीच इच्छा, 

मी भुई चे अंग व्हावे,.....

रोमरोमांतून माझ्या, 

नवनिर्मितीचे कोंब फुटावे....!

मी फुलांचे रंग व्हावे,

अन् धुंदीचे गंध पसरावे.....

मी नदीच्या संग वहावे,

अन् वाऱ्यासंगे लहरावे.....

पाखरांचे मी पंख बनावे,

झेप घेण्या, आकाश व्हावे !

अंधारल्या जीवांसाठी,

अवघा देह "चांदणे" असावा.

भुकेजल्या तान्ह्या साठी

करुणेचा पान्हा फुटावा.

शेवटी श्वास जाताना 

जगण्याचा 'महोत्सव' व्हावा 

जगण्याचा 'महोत्सव' व्हावा !!

✍️ सुजाता 

मोक्ष

हवा कशाला  मोक्ष, 

किंवा 'कुंड़लीनीची जागृती....

आयुष्याचा प्रवास मस्त आहे,

 कशाला मृत्यूची भिती ?

खूप पाऊस पड़तोय?

 ऑफिसला दांड़ी मारून चिंब भिजावं,

पक्षांच्या सूरात सूर मिसळून

 हळूच गाऊन घ्यावं...!

कधीतरी पहाटे ऊठून 

सूर्य उगवताना पहावं....

झाड़ांवर कोवळं ऊन

 उलगड़ताना दिसावं....!

मंदिरात, काही न मागता,

 नुसतंच, घंटेचा  'नाद' ऐकावा,

कोकिळेला साद देऊन,

 'प्रतिसाद '  घ्यावा....!

सूर्यास्तानंतरही समुद्रकिनारी बसावं,..

हलकेच अंधाराचं पांघरूण

 अंथरलेलं  जाणवावं...!

अशा छोटया छोटया जाणिवा,

 जगणं समृद्ध करतात,

आयुष्याचं  लेणं पवित्र, -

 'शुदध'  करतात....!!

-✍सुजाता

माझी कविता

देवानी वरदान दिलंय मला,

 मनातल्या भावना कागदावर उतरवण्याचं

नाही तर माझ्याच भावनांच्या स्तुनामीमध्ये 

वाहून गेले असते,.... मीच.....!

आता कागदांना भिजवून, डोळे कोरडे होतात,

अंगार उतरवून वहीवर, मन होतं शांत 

आणि कडू जहर दुःख पिऊन,

 कवितेत उमटतं "स्मित"!

जे मोठ्याने ओरडू नाही शकत मी,

ते कागदावर ओतत जाते,....

स्वतःला रिती करत 

"सद्चिदानंदा"नी भरत जाते....!!

✍️ सुजाता

गणपती

गणेशा, कशी करावी तुझी आराधना....

रूपातच तुझ्या, सर्व विश्व सामावते ना !

तू विघ्नहर्ता, तूच कर्ता आणि करविता...

सर्वप्रथम तुज पूजितो,

 काम सफल होण्याकरिता.

आनंदिते मी तुझे रुप न्याहाळता,....

तुझे नाम घेता, तुझे गीत गाता.

चिंतीते मी तुझ्या रूपाची प्रतिकात्मता,

सकळ विद्यांचा तू अधिपती, तू ज्ञानदाता !

तू एकदंता, समचित्ता, चतुर्भुज तू,फलदाता

सुख, संपत्ती, आरोग्य अन् मोक्षदाता !

विश्वाचा स्वामी तू, धरणीधर - करूणाकरा, 

मी पतित, मजवरी कृपा करा.

"मोद" देशी तू "मोदक" खाता,

लंबोदर तू, माझ्या पापांचे क्षालन करा !

ओंकार स्वरूपा, आले मी तुज शरण....

मुक्त करी मज, तोडावे आता सारे बंधन !

✍️ सुजाता 🙏🌺🙏

वृद्धाश्रम

काय नसते वृद्धाश्रमात ?.....

समवयस्कांची साथ मिळते,

आतापर्यंत कष्टात काढलेले आयुष्य,

आता मनासारखे जगण्याचे स्वातंत्र्य मिळते.

काय नसते वृद्धाश्रमात......?

 कोणी प्रत्यक्ष जाऊन बघितले ??

दुरून नुसतीच नावं ठेवायची,.....

 काही जणांना खोडच असते !

वया परत्वे परिपक्वपणा दाखवून

तरुणांनाही स्वातंत्र्य द्यावे,.....

आपणच सारे करण्याचा अट्टाहास सोडून,

त्यांनाही जबाबदारीचे भान द्यावे !

*अथश्री* सारखे सहनिवास हवेत वाढाया,

"जनरेशन गॅप" सामंजस्याने भराया,

वृद्धाश्रम नव्हे, "ज्येष्ठ सहनिवास" हवे म्हणाया

लांब राहिले, म्हणून आटत नसते माया,

परिपक्व फळाच्या गोडव्याची किमया.....

 संध्याछाया *सुखविती* हृदया.....!

✍️ सुजाता 

आनंद

कुणीतरी मला विचारलं,

 तुझ्या आनंदाचं रहस्य तरी काय ?..

आमच्यासारखीच दुःखं असताना,

 कटकटी असताना,

 तू एवढी मजेत कशी काय ?.....

मी हसले, म्हटलं त्यात काय.....?

 दुःखांना गोंजारायचं की काय,

कटकटींना तर हजार पाय.....

कंटाळा येण्याला तर सीमाच नाय.....!

पण खरं सांगू का, 

हा आनंद मला कुठे मिळाला नाही,

की दुसऱ्या कुणाचा,.... मी चोरलाही नाही.

हा आनंद.... माझा मी निर्माण केलाय !

दुःखाला मी खो दिलाय....

कंटाळ्याला मी लपवून ठेवलंय,

हास्याची लगोरी उभारलीए,

अन्  *"मज्जेची"*  चौकार ठोकलीए.....!

कुणाकुणाची नावे घेऊ,.....

आणि माझ्या आनंदाचे रहस्य सांगू....

आवडीची माणसं आजूबाजूला असतातच, नावडती मात्र हळूच गाळायची.....!

निळं निळं आकाश, रंगबिरंगी फुलं,

सुखवणारा वारा आणि गाणारे पक्षी....

आकाशात मस्त असते, ढगांची नक्षी !

आनंदाची काही गुरुकिल्ली नाही,

 कारण  तो मुळी बंदिस्तच नाही....!

✍️ सुजाता 💃💃💃💃

जखम

भाळीची जखम भळाळती राहण्याचा

अश्वत्थाम्याला शाप असतो,.....

पण आपण का उगीचच

जुनी दु:खं सांभाळून ठेवतो ?

२० वर्षांपूर्वी झालेले अपमान, शल्य

कुरवाळत बसतो....?

का, भूतकाळाला, वर्तमानातली जागा अडवू देतो....?

वर्तमान काळाला जो खरंच "Present" मानतो,

टोचणाऱ्या आठवणी जो मनातून काढून टाकतो,

तोच खरंतर मुक्त, आनंदी जीवन जगतो !!

✍️ सुजाता.

अंतिम सत्य

मातीतूनी  मूर्ती बनवली,

देवत्वही प्राप्त झाले,

पूजा झाली, सोहोळा झाला ......

अंति विसर्जनही ठरलेले....!

नश्वर सारे,.... सारे क्षणभंगुर

सगुणातून निर्गुणाकडे जायाचे.

आवाहनानंतर विसर्जन निश्चित,

काहीच ना इथे  *ठेहरायाचे* ....!

देह क्षणिक, *चैतन्य* अंतिम सत्य....

कशालाच  ना चिकटून बसायाचे,

निर्गुण ब्रह्म केवळ तरते.....

बाकी सारे बुडायाचे.....!!

✍️ सुजाता 🙏🙏